Niniak Mamak

​Nan tinggi tampak jauh 

Nan gadang jolong basuo 

Kayu gadang di tangah padang

Tampek balinduang kapanasan

Tampek bataduah kahujanan

Ureknyo tampek baselo 

Batangnyo tampek basanda 

Ka pai tampek batanyo

Pulang tampek babarito

Biang nan ka menambuak

Gantiang nan kan mamutuih

Tampek mangadu sasak sampik

Nan cadiak candokio

Nan arif bijaksano

Tau diunak kamanyangkuik

Tau dirantiang kamancucuak

Tau diangin nan basiru

Tau di ombak nan badabua

Tau dipasang turun naiak 

Tau jo ereng gendeng

Tau dibayang kato sampai

Alun bakilek lah bakalam

Sakilek ikan dalam aie

Lah tau jantan batinonyo

Tau di cupak nan duo puluah

Paham di Limbago nan sapuluah.

Niniek mamak di Minangkabau

Nan badeta panjang bakaruik 

Bayangan isi dalam kuliek 

Panjang tak dapek kito ukua

Leba tak dapek kito bilai

Kok panjangnyo pandindiang korong 

Leba pandukuang anak kamanakan 

Hamparan di rumah tanggo

Paraok gonjong nan ampek

Tiok liku aka manjala

Tiok katuak ba undang undang

Dalam karuik budi marangkak

Tambuak dek paham tiok lipek

Manjala masuak nagari

Babaju hitam gadang langan

Langan tasenseng tak pambangih

Pangipeh angek naknyo dingin

Pambuang nan bungkuak sarueh

Siba batanti timba baliek

Gadang barapik jo nan ketek

Tando rang gadang bapangiriang

Tatutuik jahit pangka langan

Tando membuhue tak mambuku

Tando mauleh tak mangasan

Lauik tatampuah tak berombak

Padang ditampuah tak barangin

Takilek ikan dalam aie

Lah jaleh jantan batinonyo

Lihienyo lapeh tak bakatuak

Tando pangulu padangnyo lapang

alamnyo leba

Indak basaku kiri jo kanan

Tandonyo indak pangguntiang dalam lipatan

Indak panuhuak kawan seiriang

Basarawa hitam ketek kaki

Kapanuruik alue nan luruih 

Panampuah jalan nan pasa 

Ka dalam korong jo kampuang

Sarato koto jo nagari 

Langkah salasai baukuran 

martabat nan anam membatasi

Murah jo maha di tampeknyo 

Ba ijo mako bakato

Ba tolam mako bajalan

Saruang sabidang ateh lutuik 

Patuik senteng tak bulieh dalam 

Patuik dalam tak bulieh senteng

Karajo hati kasadonyo

Mungkin jo patuik baukuran

Murah jo maha di tampeknyo 

Sanjatonyo karih kabasaran

Sampiang jo cawek nan tampeknyo

Sisiknyo tanaman tabu

Lataknyo condong ka kida

Dikesong mako dicabuik

Gembonyo tumpuan puntiang

Tunangannyo ulu kayu kamat

Bamato baliak batimba

Tajamnyo bukan alang kapalang

Tajamnyo pantang melukoi

Mamutuih rambuik diambuihkan

Ipuahnyo turun dari langit

Bisonyo pantang katawaran

Jajak ditikam mati juo

Ka palawan dayo rang aluih

Ka palunak musuh di badan

Karih sampono Ganjo Erah

Lahie bathin pamaga diri

Kok patah lidah bakeh Allah

Patah karih bakeh mati

 
Pamenannyo tungkek kayu kamat 

Ujuang tanduk kapalo perak 

Panungkek adat jo pusako 

Gantang nak tagak jo lanjuangnyo

Sumpik nan tagak jo isinyo

Falsafah pakaian rang penghulu

Dalam luhak ranah Minang

Kalau ambalau meratak ulu Kalau

Puntiang tangga mato tabuang 

Kayu kuliek mengandung aie

Lapuk sampai kapanguba 

Binaso tareh nan di dalam 

Kalau penghulu berpaham caie

Jadi sampik alam nan leba 

Dunia akhirat badan tabanam

Rancak tapian dek nan mudo

Kalau kito mamacik ulu

Pandai menjago puntiang jo mato 

Petitih pamenan andai 

Gurindam pamenan kato

Jadi pangulu kalau tak pandai

Caia nagari kampung binaso 

Adat ampek nagari ampek 

Undangnyo ampek kito pakai

Cupak jo gantang kok indak dapek 

Luhak nan tigo tabangkalai 

Luhak yang tiga terbengkalai

Bapantang kuning dek kunik 

Tak namuah lamak dek santan 

Tinggalkan Balasan

Isikan data di bawah atau klik salah satu ikon untuk log in:

Logo WordPress.com

You are commenting using your WordPress.com account. Logout / Ubah )

Gambar Twitter

You are commenting using your Twitter account. Logout / Ubah )

Foto Facebook

You are commenting using your Facebook account. Logout / Ubah )

Foto Google+

You are commenting using your Google+ account. Logout / Ubah )

Connecting to %s